Isithombe: ngabeBackPagePix
I-ORLANDO Pirates izoya emdlalweni wayo nomkhaya iKaizer Chiefs uxhuga ngemuva kokulahlekelwa yisitobha esimqoka.
IPirates iguqiswe ngo-1-0 yiSekhukhune United koweBetway Premiership ngoLwesithathu kusihlwa e-Orlando Stadium, eSoweto.Ihlulwe ngegoli likaTresor Tshibwabwa.
IBucs iqede lo mdlalo ingasaphelele kukhishwa ngekhadi elibomvu uNkosinathi Sibisi odlala emuva.
Ukuphuma kukaSibisi kusho ukuthi ngeke awugijime umdlalo weBucs namaKhosi ongoMgqibelo ngo-15h00 eFNB Stadium, eSoweto.
Ngaphandle kwalokho ukwehlulwa kwayo kunciphise amathuba okunqoba isicoco seligi njengoba izama ukusihlwitha kwiMamelodi Sundowns.
Ngakolunye uhlangothi, iSundowns iqhubekile nokuvula igebe esicongweni ibhaxabula ngo-3-0 iRichards Bay koweligi ngoLwesithathu kusihlwa eLoftus Stadium, ePitoli. Amagoli eDowns ashaywe ngu-Arthur Sales, u-Iqraam Rayners noMarcelo Allende.
