INTATHELI YELANGA
EZIMNANDI kubalandeli be-Orlando Pirates ngesitobha sabo esiyintandokazi, u-Olisa Ndah, okuvela ukuthi sesikulungele ukubuyela enkundleni emuva kwezinyanga singabonakali, ngenxa yokulimala. UNdah ulimale iBucs ibhekene nePolokwane City koweBetway Premiership mhla ka-24 kuSeptember wonyaka odlule.
IPirates ibhekane nenkinga ngesizini esanda kuphela ilinyalelwa yinqwaba yabadlali basemuva; okubalwa kubo yena uNdah, uThabiso Sesane, uThabiso Lebitso noThapelo Xoki, obuyele enkundleni isizini isisele nemidlalo embalwa ukuba iphele. Lokhu kuvule ithuba kuMbekezeli “TLB” Mbokazi, olandwe eqenjini lePirates leDStv Diski Challenge, wangena khanxa esitayeleni seqembu elikhulu.
ISITHOMBE NGABE: BACKPAGEPIX
Ebuzwa – enkundleni yokuxhumana i-X – uMike Makaab, ongumphathi wezindaba zalo mdlali, mayelana nokuthi ngabe usekulungele yini ukubuyela ensimini, uthe: “Yebo. Masethembe nje ukuthi kule sizini ngeke ahaqwe wukulimala. Yena usekulungele ukudlala.”
Ukubuya kukaNdah kuzophathisa ngekhanda elimnandi umqeqeshi omusha weBucs, u-Abdeslam Ouaddou, odabuka eMorocco. Lo mqeqeshi usanda kumenyezelwa njengozohola iBucs, esuka kwiMarumo Gallants. Uma lo mqeqeshi egculiseka ngesimo sikaNdah, kusho ukuthi lesi sitobha saseNigeria sizokube siyingxenye yekhempu yePirates yokuzifudumezela ukuqala kwesizini entsha ezoyenzela eSpain. Izobhekana neBolton Wanderers mhla ka-11 kuJuly, iPafos yaseCyprus mhla ka-13, yiLas Palmas neGranada okungamakilabhu aseSpain, mhla ka-17 no-19 ngokwehlukana.
