Ezinhle nezimbi kubashayeli bezimoto ngo-petrol

BHEKI NDLOVANA 

IZINDABA ezimnandi nezinhle kubanikazi bezimoto njengoba kubikezelwa ukuthi intengo kaphethiloli ingase yehle ngoDecember, kodwa ngeshwa ekadizili yona kulindeleke ukuba yenyuke. 

ICentral Energy Fund (CEF), iveze ukuthi intengo kaphethiloli kungenzeka yehle ngo-5c elitheni (Petrol 95) no-6c elitheni (Petrol 93). 

Intengo kadizili yona kuvela ukuthi kungenzeka yenyuke ngokuphakathi kuka-40c no-38c ilitha. Ekapharafini kuvela ukuthi kungenzeka yenyuke ngo-39c elitheni. Nokho lokhu kusengaguquka njengoba inyanga isephakathi. 

Ngokuvamile uMnyango wezaMandla neziMbiwayo uye umemezele intengo ekupheleni kwenyanga, intengo entsha iqale ukusebenza ngoLwesithathu lokuqala enyangeni. Intengo yomphongolo kawoyela ongahluziwe ezimakethe zomhlaba namandla erandi – uma liqhathaniswa nedola lase-USA – yikhona okuba nomthelela omkhulu oguqukweni lwentengo yale mikhiqizo kawoyela. 

Okuqaphelekayo wukuthi kusukela ngemuva kokhetho lwase-USA – lapho kunqobe khona uMnu Donald Trump, weRepublican Party, ehlula uNkk Kamala Harris weDemocratic Party – irandi libonakale lehlelwa ngamandla. Ngakolunye uhlangothi, intengo yomphongolo kawoyela ongahluziwe yona ibonakala yenza kangcono njengoba yehlile. 

Kuzokhumbuleka ekuqaleni kwale nyanga,  intengo kaphethiloli yenyuke ngo-25c elitheni; ekadizili yenyuke ngokuphakathi kuka-20c no-21c kanti ekapharafini yenyuke ngo-21c.