LUCKY CAIN
KUHLONGOZWE ukuba umphakathi waseThekwini namaphethelo usebenzise ezobuchwepheshe bukamakhalekhukhwini (mobile app) bukaMasipala weTheku ukunqanda ukuthi bangakhokhiswa imali engaphezulu yamanzi nogesi. Lokhu kuvele ngesikhathi amakhansela alo masipala ehlangane e-Inkosi Albert Luthuli International Convention Centre (ICC), eThekwini, ngoLwesithathu.
Kulo mhlangano, iDA isole i-ANC ngokuhudula izinyawo nokungaqhamuki nesu lokulwa nezindleko ezimba eqolo ezi-khokhiswa abantu.
Sekubikwe kaningi ngendlela lo masipala othumela ngayo izikweletu zamanzi nezikagesi njengoba usebenzisa uhlelo “lokuqagela” uma ubiza la manani emphakathini. Kuvele ukuthi lolu hlelo luyindida njengoba izisebenzi zikamasipala zingaziyeli mathupha ukuyofundela ukuthi kusetshenziswe ugesi namanzi angakanani.
IDA iveze ukuthi lolu hlelo luhlukumeza umphakathi waseThekwini njengoba ugcina ukhokhiswa nezindleko ezingahlangene nawo.
Iziphendulela i-ANC, inxuse ukuba abantu bathole ubuchwepheshe i-mobile app, kaMasipala weTheku ukuze bakwazi ukuzithumelela bona izinombolo zama-meter amanzi nakagesi. Iveze ukuthi okwamanje yiyona ndlela engaba yisixazululo sokuba abantu bathu-nyelelwe izindleko okuyizona futhi ezihambisana namanzi nogesi abawasebenzisile.
Kugcine kuvunyelwana ngokuthi uhlelo lwale mobile app, lungaba yisixazululo sesikhashana.
Amaqembu aphikisayo kulo masipala anxuse ukuba umasipala nezisebenzi zawo, uyisukumele indaba yokuthumela izincwadi zezikweletu ngaphandle kokuthola izinombolo eziqondile.
lucky.cain@ilanganews.co.za
