UKUPHUMA kweDA kuhulumeni wenhlanganisela yamaqembu, edume ngeleGovernement of National Unity (GNU), kungaqumba phansi umnotho wakuleli.
Lesi yesexwayiso sikaNkk Helen Zille oyiFederal Chairperson yeDA, asenze engcoxweni ohlelweni iFaceTheNation kuleli sonto. UNkk Zille uthi inhlanganisela ye-ANC, i-EFF neMK Party – athi ifunwa yiSekela likaMengameli uMnu Paul Mashatile – ingaqumba phansi umnotho wezwe.
“Uma siphuma kwiGNU, kungaba khona uhulumeni ohlanganiswe ngamaqembu amancane, ongenalo uzinzo, noma inhlanganisela ye-ANC, i-EFF neMK Party, efunwa nguMashatile. Inhlanganisela yalawa maqembu ingawisa umnotho wezwe kungakapheli ngisho isonto,” kusho uNkk Zille.
Uthe uma iDA ingaseyona ingxenye kahulumeni, abatshalimali bazobaleka, futhi izwe lingaxoswa ekubeni yinxenye yesivumelwano sohwebo seMelika, i-AGOA (African Growth and Opportunity Act).
UZille ukhuluma kanjena nje, uNobhala-Jikelele we-ANC uMnu Fikile Mbalula usanda kutshela iDA ukuthi mayiphume kwiGNU uma izobukela phansi ubumbano lwamaqembu akuhulumeni.
