UCHAZWE njengesibusiso esikoleni samabanga aphakeme Inanda Newtown Comprehensive High School usomabhizinisi onikele ngesamba sikaR200 000 ukusiza abafundi abadinga usizo nezidingo zesikole.
UMnu Sandile Msomi ongumnikazi wezinkampani iQiniso Protection Services neNethezeka Trading sekungokwesibili iminyaka ilandelana ephenduka uMsamariya ocwebileyo kulesi sikole.
Ngonyaka owedlule wagixabeza lesi sikole ngo-R100 000 waphinde wasixhasa nangamajezi ebhola likanobhutshuzwayo (soccer) nelomnqakiswano (netball) waphinde wathengela nabadlali amakhokho namateki.
Kulo nyaka uyiphinde kabili imali yoxhaso lwangonyaka owedlule waphinde waxhasa nomcimbi obungoLwesihlanu wokuklomelisa abafundi abenze kahle kulesi sikole.
Ekhuluma ngokunikela kulesi sikole uMsomi uthe okumenze waxhasa lesi sikole yingoba ufunde kusona futhi uyabuqonda ubunzima nosizi obubhekana nabanye babafundi abafunda.
Uthe ubone kufanele ukuthi abuyisele kulesi sikole njengoba sisenhliziyweni yakhe futhi ezimisele ukuthi abe wusizo kusona ngesibusiso abusiswe ngaso.
Uthe ngalolu xhaso ufisa ukugqugquzela abafundi ukuba bakhuthazeke ukuba baphokophele empilwe bangagxili ezintweni ezimbi ezenzekalayo nalezo ezidumisa Inanda kabi.
Uveze ukuthi uyafisa nabanye abantu babone ukuthi nakuba Inanda idume ngezinto ezimbi kodwa kukhona okuhle okwenzeka khona.
UMsomi uveze ukuthi sekuneminyaka enikelela kulesi sikole nakuma kugqame ngonyaka owedlule kodwa usebe wusizo kusona isikhathi eside.
UThishomkhulu walesi sikole uMnu Thulile Khumalo uchaze uMsomi njengesibusiso kusona ikakhulukazi njengoba uMnyango wezeMfundo usabhekene nezinkinga zezimali futhi bengalitholi uxhaso kuwona.
Uthe lolu xhaso lukaMsomi luzodlala indima emqoka njengoba luzokwazi ukubheka labo bafundi abenze kahle ku-matric ngonyaka owedlule abafuna ukubhalisa ngaphambi kokuthi kuze kulunge uxhaso lwe-NSFAS.
Uthe luzophinde lubheke nabanye abafundi abakhona ngaphakathi esikoleni ngemifaniswano yesikole nokunye abangasizakala ngakho.
Emcimbini wangoLwesihlanu abafundi abenze kahle baklonyeliswe ngezitifiketi, ama-medal nezindondo ukubagqugquzela.
