IMEYA kumasipala Umngeni, uMnu Chris Pappas uthi isiqinisekisiwe imiphumela yokubalwa kwamavoti ngaphansi kukamasipala wakhe. Ubhale ekhasini lakhe likaFacebook ukuthi Umngeni unezihlalo ezingu-25. Kulo masipala uthe iDA inezingu-15, kube yiMKP ethole ezingu-5, i-ANC yathola-4 bese kuba yi-IFP enesisodwa.
Lokhu kuza emva kokuthi iDA kulo masipala ihambe phambili ngamavoti angu-61.13%, kwathi iMKP yathola angu-18.65%, kwalandela i-ANC ethole angu-15.81% kwagcina i-IFP ethole u-1.19%. Amanye amaqembu asohlwini oluphezulu angakwazanga ukuthola izihlalo ngenxa yokuba namavoti angaphansi kwephesenti elilodwa abekhona eMngeni, singabala iVF Plus, i-EFF, i-ACDP, i-NGG, i-SACP, i-ACC neMayibuye. Lawa abesesigabeni samaqembu angu-11 ohlwini oluphezulu kanti akhona amanye abekhona. Ngokhetho loHulumeni baseKhaya lwango-2021 kumasipala waseMngeni, iDA yakwazi ukuthola izihlalo ezingu-13 yalandelwa yi-ANC eyathola ezingu-10 kwagcina i-EFF eyathola ezimbili. Kulokhu i-EFF ayitholanga lutho eMngeni kanti ne-ANC ilahlekelwe yizihlalo eziyisithupha ebinazo kulo masipala. I-IFP ihlomule ngesisodwa njengoba ibingenaso kulo masipala.
tndlovu@ilanganews.co.za
