ZIJABULISE abaningi izindaba zokuvuselelwa kwenkontileka kaJenene Nhlanhla Mkhwanazi, onguMkhuzi wamaPhoyisa KwaZulu-Natal. Inkontileka kaJenene Mkhwanazi, ibiphela kule nyanga kaNdasa (March).
UMkhuzi wamaPhoyisa kuZwelonke uthe akukho okuzomvimba ukuvuselela inkontileka kaMkhwanazi njengoba ethe izingxoxo sezisemaphethelweni. UNdunankulu waKwaZulu-Natal, uMnu Thamsanqa Ntuli ngomunye wabantu abaphumele obala befuna ukuba yelulwe inkontileka kaMkhwanazi, ongaconsi phansi kubantu abathobela umthetho ezweni nasesifundazweni kanti uyiqaqa kwizephulamthetho.
UMkhwanazi washaqisa abaningi ebiza isithangami sabezindaba ngomhla ka-6 kuNtulikazi (July) ngonyaka odlule, ethi kukhona osopolitiki nabathile abagxambukela ekusebenzeni kwamaphoyisa.
Lokhu kwaholela ekutheni uMnu Senzo Mchunu, onguNgqongqoshe wamaPhoyisa kuZwelonke, anikwe ikhefu eliyisipesheli. Lokhu kwaholela nasekutheni kusungulwe iKhomishani kaJaji uMbuyiseli Madlanga neKomidi lasePhalamende, eliphenya ngazo lezi zinsolo zikaMkhwanazi.
Uma isivuselelwe inkontileka kaMkhwanazi, uzoqhubeka anokuhola amaphoyisa eKZN kuze kube ngu-2031.
