IQEMBU lezepolitiki i-MK Party seliyalele ilungu layo lePhalamende uNkk Duduzile Zuma Sambudla ukuba akhiphe isixolise ngemibhalo yakhe ezinkundleni zokuxhumana ebigxibha futhi ithunaza uNobhala Jikelele waleli qembu uMnu Floyd Shivambu.
Leli qembu liveze ukuthi liyazi ngale mibhalo ka-Duduzile ebhekiswe kunobhala wayo laveza ukuthi iwukwephula imigomo futhi ayihambisani nomthetho wokuziphatha waleli qembu. Liqhube ngokuthi lesi senzo sikaDuduzile sikhombisa ukuhlakaza nokuthunaza iqembu.
Ngokusho kwesitatimende saleli qembu uMengamli walo uMnu Jacob Zuma onguyise kaDuduzile usemyaleleukuba akhiphe isixoliso ngaphandle kokubeka imibandela kuNobhala Jikelele, amalungu aleli qembu nabona bonke abantu baseNingizimu Afrika.
UZuma uphinde wayalela uDuduzile ukuba axolise nasezinhlakeni zaleli qembu angaphansi kwazo okubalwa ikhokhasi yeMK Party ePhalamende likazwelonke nakwi-Pan African Parliament.
Umyalele ukuba akhiphe lezi zixolise ngokushesha. I-MK Party iveze ukuthi ngemuva kwalokhu kuzobe sekuqhubeka uhlelo lokuqondiswa kwezigwegwe lwangaphakathi oluhambisana nomthetho-sisekelo lwaleli qembu.
Liqhube ngokuthi uma uDuduzile ehluleka wukulandela le miyalelo uzothathelwa izinyathelo ezinqala ezingaholela ekutheni bunqanulwe ubulungu bakhe kuleli qembu futhi ahoxiswe kuzona zonke izinhlaka alimele kuzona.
Phakathi kwemibhalo kaDuduzile enkundleni yokuxhumana i-X (Twitter) kubalwa othi “U-Floyd uyinto engenamsebenzi” neminye emthukayo.
