WETHEMBISA imvuselelo enkulu uBrenda Mtambo emcimbini wakhe obizwa ngaMahubo kaGogo ozoba se-The Playhouse, eThekwini mhla ka 15 August. Le ntokazi engadinge kwethulwa emculweni we-gospel kwazise yazakhela igama kuwona ngezikhathi icula kwiJoyous Celebration ilandisa ngalo mcimbi iqoke amahubo kagogo wayo ngenhloso yokuzelapha.
“Ngesikhathi ngicula lamahubo ngangikade ngidlula esikhathini lapho ngangilahlekelwe khona wugogo wami okunguye ongikhulisile – bekuyisikhathi esinzima kakhulu empilweni yami. Njalo uma kufika umuzwa wokumkhumbula bengimane ngicule amahubo ayewakhonzile, lokhu bekungiduduza kulethe nethemba kimina,” esho.
UBrenda uthi akuqaphelile wukuthi lamahubo abengalethi ukududuzeka kuyena kuphela kepha nabanye bebethinteka lapho ewahuba. “Lezi yizingoma esikhule ngazo, ezisikhumbuza ukuthi sivelaphi futhi ezisithwalile njengemindeni. Yizo futhi lezingoma ezizokwazi ukuthwala isizukulwane esizayo zisinike ithemba. Kimina bengithi mangizicula zingelaphe futhi ngimuzwe nogogo ehamba nami ngokomoya,” esho.
Uthi ngesikhathi ezicula ubekade engaziqophile kepha ubezicula uma ngabe esemcimbini. “Kepha ngihambe ngabona ukuthi abantu bayazidinga ngaziqopha futhi nabo bezicela. Engikubonile wukuthi wonke umuntu lapho elalele lezingoma ufikelwa yilomuzwa nami ongifikelayo. Lamahubo ayindlela yokuphindela kumculo wokholo esikhule ngawo,” esho.
UBrenda waziwa ngamanoni esingabala kuwo athi: Ungenzela Konke Okuhle, Ixesha Lami, Themba Njalo, I Love You nethi uMhlaba Wethu.
Emcimbini wakhe ozoba mhla ka 15 August uthi uzocula nezingoma ezintsha ezikwi-album yakhe aseqedile ukuyiqopha esihloko sithi Hymns and Testimony. “Umuntu owazi uBrenda ecula i-gospel uzomthola kule show futhi ezwe nezingoma ezintsha. Ngiza nemvuselelo enkulu eThekwini, bazobhema bakholwe, sizodumisa futhi siphole ndawonye,” kuphetha uBrenda. USneziey Msomi uzobe eyingxenye yalo mcimbi naye.
