INHLANGANO yabashayeli bama-Uber (e-hailing) KwaZulu-Natal (KZN E-Hailing Council) ithi ikhathazekile ngokungaphephi kwempilo yabashayeli bayo, ngemuva kokuba ababili babo besinde behlaselwa izolo ngoLwesithathu eClermont, eThekwini.
Ngokusho kukaMnu Sipho Mabika, okhulumela le nhlangano, omunye wabashayeli babo ubelinde ikilayenti, ngesikhathi kuza othile kuyena “osebenza embonini yamakhumbi”, emtshela ukuthi makahambe. Uthi emuva kwalokho uzwe sekuqhuma isibhamu, imoto abehamba ngayo isidutshulwa.
Omunye umshayeli wabo kuthiwa uhlaseliwe, washaywa. I-KZN E-Hailing Council ithi ifuna uhulumeni ungenelele ngokushesha.
“Bobabili abashayeli bahlaselwe bezesimotweni zabo, bobabili baphuthunyiswe esibhedlela. Siwavulile amacala emaphoyiseni, sifuna baboshwe abantu abenze lokhu ngoba bayaziwa,” esho.
Kuyo le ndawo ngoNhlangulana (June) kuthunjwe umshayeli we-Uber, watholakala esebulewe.
Kwenzeka isigameko sayizolo nje, izwe lisathuthumele nge-video yokubulawa kukaMthokozisi Mvelase, wasoLundi, naye okuthiwa udutshulwe ngabamakhumbi, maqede isidumbu sakhe sangqongqiswa nemoto, ngaphandle kwenxanxathela yezitolo iMaponya Mall, eSoweto, eGoli.
