INational Prosecuting Authority (NPA) ithi izoqhubeka nesicelo sayo sokuba kuchithwe isinqumo sokuhoxisa amacala abebhekene nomfundisi waseNigeria uTimothy Omotoso, yize esehambile kuleli.
Esitatimendeni, okhulumela iNPA uMnu Mthunzi Mhaga uthe akudingeki ukuthi abe khona ummangalelwa uma kulalelwa isicelo sokuphikisa ukuhoxiswa kwamacala abebhekene nawo.
“Indlela okusebenza ngayo umthetho waseNingizimu Afrika, akuphoqi ukuthi abe khona siqu sakhe ummangalelwa. Umthetho uthi makube khona abameli bakammangalelwa nabakammangali, isikhonzi seNkantolo ePhakeme neseNkantolo eNkulu yokuBuyekezwa kwamaCala, nabehluleli (amajaji),” kusho isitatimende.
I-NPA ithi u-Omotoso okwamanje akayona iFugitive, okungumuntu obalekela umthetho wakuleli. Ithi ngaleyo ndlela kawukho umthetho obuphoqa ukuthi angavunyelwa ukuya kwelakubo uma efuna.
Ithi uma siphumelela isicelo sokuphikisa ukwesulwa kwamacala ka-Omotoso, bazobe sebekafa isicelo eNigeria, sokuba abuyiselwe kuleli (extradition) ezobhekana namacala athweswe wona.
