BHEKI NDLOVANA
KUGQUGQUZELWA ukuba abantu basazi isimo sempilo yabo ngokuba bahlolele isandulela ngculaza, bese kuthi labo asebesulelekile badle imishwanguzo futhi bangayiyeki.
UMnu Paul Mashatile oyiSekela likaMengameli wezwe ugqugquzele abantu baseNingizumu Afrika ngesikhathi ekhuluma emcimbini wosuku lwengculazi olugujwa umhlaba wonke, olubizwa ngokuthi yiWorld Aids Day.
Lo mcimbi kazwelonke ubuwenzelwe eSisa Dukashe Stadium, eMdantshane, e-East London, e-Eastern Cape izolo ngeSonto.
UMashatile uthi eNingizimu Afrika lisephezulu kakhulu izinga labantu abanesandulela ngculazi. Uthe eNingizimu Afrika cishe bawu-8 million abantu abaphila nesandulela ngculazi.
Uthi iHIV idlange kakhulu kubantu abasebancane, ikakhulukazi amantombazane asesigabeni sokukhula (adolescent stage) aneminyaka yobudala ephakathi kuka-15 no-24. Uthi masonto onke kutholakala izingane zamantombazane ezikule minyaka cishe eziwu-1300 ezisuleleka ngeleli gciwane. Uveze ukuthi izibalo zikhomba ukuthi sincane isibalo sabafana abakule minyaka abatholakala sebesuleleke ngaleli ngciwane.
“Lokhu kusho ukuthi amantombazane asengcupheni enkulu yokutheleleka ngeHIV,” kusho uMnu Mashatile.
Uqhube wathi kunezinto ezahlukene ezinomthelela ekutheni izingane zamantombazane zibe sengcupheni enkulu yokuthola iHIV. Lezo zinto uthe zibandakanya nokwakheka kwendalo kwemizimba yazo izingane zamantombazane, kanye nokuthandana nabantu abadala (ngenxa yezimo zokuxakeka empilweni).
Uqhuba wathi ukulwa nenkinga yeHIV kudinga ubambiswano, wathi akuwona umsebenzi kahulumeni kuphela. Ubale izinhlaka ezahlukene, okubalwa abamabandla, abaholi bomdabu, yizinkampani ezizimele, wosomabhizinisi, nezinye izinhlaka ezahlukene.
“Uma uma sihluleka ukulwa ne-HIV kanye ne-AIDS lokho kuyoholela ekubhidlikeni kwesizwe sethu,” kusho uMashatile.
KwaZulu-Natal umcimbi walolu suku ubuwenzelwe eMzingazi, eRichards Bay, ngaphansi kwesifunda iKing Cetshwayo. Kulo mcimbi uNdunankulu wesifundazwe uMnu Thami Ntuli ugcizelele khona ukubaluleka kokuba abantu bahlole isimo sabo sempilo.
“…hlola impilo yakho ngaso sonke isikhathi ukuze sikwazi ukukhunjulwa njengesizukulwane esayiqeda nya iHIV/AIDS,” kusho uNtuli.
