ZIZOLALWELWA ngoLwesihlanu eNkantolo eNkulu yaseGoli izethulo zabammeli beSouth African Human Rights Commission (SAHRC), emangalela uNgizwe Mchunu ngenkulumo ayenza ngonyaka ophelile, ekhwela edilika kubantu abathandana nabobulili obufana nobabo.
Lokhu kuqinisekiswe yiSAHRC, ngesitatimende esikhiphe izolo ebusuku, ithi loludaba luzokwendlalwa ezithebeni zenkantolo. Kuzokhumbuleka ukuthi uNgizwe wethula le nkulumo ethathwa njengecwasa abeLGBTQIA. Le nkulumo kaMchunu yayilandela umshado owabasematheni ezinkundleni zokuxhumana, lapho okwakushada khona abesilisa ababili ababehlobe ngemvunulo yamaZulu.
UNgizwe wabe esenikela ezinkundleni zokuxhumana washiya angalazi kulaba besilisa, wahlanganisa nabo bonke abaphila lolu hlobo lwempilo. Wafanisa isenzo salaba ababeshada nokudelela isihlalo seNdlunkulu kaZulu. Ngokwesitatimende esikhishwe yiSAHRC, abammeli bayo bazobambisana nezinye izinhlaka ezilwela amalungelo amalungu eLGBTQIA uma sebethula izethulo zabo.
“Lokhu sikwenza ngoba sikholwa wukuthi inkulumo kaNgizwe yayinokucwasa nokugcindezela amalungelo abantu. Kuwumsebenzi wethu ukuqinisekisa ukuthi wonke amalungelo ayavikeleka kuleli,” kusho isitatimende.
