UMBEKEZELI “TLB” Mbokazi uthi kuzofanele bakhohlwe ngokwenzeke emdlalweni we-Egypt, babheke umdlalo olandelayo.
IBafana iguqiswe ngo-1-0 yi-Egypt koka-group B ngoLwesihlanu. Igoli le-Egypt kube yiphenathi evalelwe enethini nguMohamed “Mo” Salah.
Nokho le phenathi isuse umsinde njengoba ibingacacile. NoSalah uzivumele ngowakhe ukuthi bekungeyona.
Akugcinanga lapho njengoba umdlali we-Egypt eke wabamba ibhola ngesandla ebhokisini labhekwa isikhathi eside yiVAR lagcina liphikwa.
“Besinethemba lokuthi unondweba uzosinika iphenathi kodwa wangasinika.Asisekho isikhathi sokukhononda manje kufanele sibhekane nomdlalo olandelayo. Kufanele senze isiqiniseko sokuthi umdlalo wethu olandelayo siyawunqoba.
Okwenzeke emdlalweni we-Egypt ngeke kusabuyela emuva, kufanele sibheke lo mdlalo ozayo ngoba umqoka,” esho.
IBafana izobhekana neZimbabwe kowokugoqa leli qoqo ngoMsombuluko ngo-18h00.
