KWEXWAYISWA iNingizimu Afrika ngobungozi engangena kubona “ngokukhoselisa” abantu basePalestine ababalelwa ku-150, okuthiwa babalekele kwelakuleli ukuzobhaca (refugees).
Kuyaliwa ePalestine njengoba impi yakhona nabakwa-Israel, seyithathe iminyaka eminingi ingapheli. La maPalestine kuthiwa akuleli ngokohlelo lokukhoselisa abantu ababaleka emazweni abo ngenxa yezimpi noma indlala.
Nokho uMnu Tim Flack, wakwaFlack Partners and Associates, uthi iNingizimu Afrika ingazithola seyisenkingeni uma yehluleka ukuchaza ukuthi la maPalestine, afike kanjani kule lizwe.
Izinhlangano eziningi ezilwela amalungelo abantu emhlabeni, ziyaweseka amaPalestine. Kuke kwaba namamashi eCape Town, izinhlangano ezilwela amalungelo abantu ziweseka.
Ihhovisi likaMengameli Cyril Ramaphosa, lithi lizocacisa maduze ngokuba khona kwala maPalestine kuleli.
