BALAHLWE ngelakubo abasolwa abane abebehlele ukuyobamba imoto yemali, okubikwa ukuthi badubulane namaphoyisa, kwafa ababili babo, esigamekweni esenzeke eSinyameni, eMsinga.
Ngokwesitatimende, amaphoyisa ancinzwe indlebe ngabesilisa abebehlela ukuyobamba imoto yemali. Kuthiwa abe eselandela umkhondo, okulapho ebone imoto yohlobo lweMercedes-Benz, ebinabasilisa abane phakathi. Kuthiwa amaphoyisa athe uma esondela kule moto, laba besilisa bavuleka ngenhlamvu bebhikise kuwona.
Kubikwa ukuthi amaphoyisa nawo aphindiselile, kwabe sekudubueka ababili bashona, kwathi ababili bona baboshwa.
Kube sekutholakala izibhamu ezingekho emthethweni nezinhlamvu. Amaphoyisa avule icala lokutholakala nezibhamu ezingekho emthethweni nezinhlamvu, nelokuzama ukubulala. Uphenyo lwamaphoyisa luveze ukuthi omunye wabasolwa ababoshiwe uke wasebenzela inkampani yonogada.
Abasolwa kulindeleke ukuba bavele enkantolo maduze.
