UMQEQESHI weKaizer Chiefs uCedric Kaze uthi abasakwenzile kule kilabhu nozakwabo uKhalil Ben Youssef – ababambe naye isigqiki sokuqeqesha le kilabhu – kakwenele ukuthi sebenganikwa lo msebenzi ngokugcwele.
IChiefs izobhekana neZESCO United yaseZambia emlenzeni wesibili ka-group D koweCaf Confederation Cup kusasa ngeSonto ngo-15h00 eMoses Mabhida Stadium, eThekwini.
Emzuliswaneni wokuqala obungeledlule eZambia, iChiefs inqobe ngo-1-0. UKaze ebuzwa ukuthi ngabe ugculisekile yini ngasebekwenzile ukuthi banganikwa lo msebenzi ngokugcwele njengoba bebambe kuze kuphele isizini, uthe: “Uma kungathiwa mangizihlole ngingasho ukuthi ngihamba kahle futhi kangihambi kahle. Angikawufezi umbandela okufanele engabe ngiwufezile ngoba ukube ngempela kuhamba kahle kufanele engabe sihleli esicongweni kwi-log.
Yinto yokuqala leyo ekhombisayo ukuthi angikakwenzi okufanele engabe ngikwenzile.Ikilabhu enjengeChiefs inkulu emhlabeni wonke, umqeqeshi olapha emhlabeni uyafisa ukuyiqeqesha. Nginesiqiniseko sokuthi iChiefs isithole izinkulungwane zamaCV abantu abagaqele lo msebenzi. Kodwa-ke silana, sisebenzela ikilabhu enkulu emhlabeni okuyinto enkulu kimina noKhalil. Into esifuna ukuyenza wukushiya ikilabhu isesimweni esihle, ” esho. Nokho uthi into emqoka wumdlalo wakusasa neZesco
