UMNYANGO wezokuThutha KwaZulu-Natal usungenelele njengoba kunesiteleka samatekisini eCleremont naKwaDabeka, eThekwini. Isiteleka siqalwe yiCleremont-KwaDabeka Taxi Association ngoLwesibili.
ISouth African National Taxi Association (Santaco), okuyinhlangano iCleremont-KwaDabeka Taxi Association engaphansi kwayo, ithi yiwona amaphoyisa adale ukuthi kube nokuphazamiseka kokuthutha abantu.
Amaphoyisa kaMasipala weTheku abophe aphinde akhipha emgwaqeni amatekisi angu-30, angaphansi kweCleremont-KwaDabeka Taxi Association, ngoba ethi kawanawo amaphemithi. Abagibeli bamatekisi basale dengwane njengoba le nhlangano yamatekisi ithe akukho tekisi ezokuba semgwaqeni kusukela namhlanje.
UMnu Ndabezinhle Sibiya, okhulumela uMnyango wezokuThutha esifundazweni, uthi uhulumeni uyangenelela ngoba ufuna isixazululo kulolu daba.
“UNgqongqoshe uMthombeni (uMnu Siboniso Duma) uhlanganisa izikhulu zamaphoyisa kaMasipala weTheku, okuyiwona abophe lezi zimoto, neSANTACO. Izimoto lezi kazikhishwanga emgwaqeni wumnyango wethu, futhi ukuboshwa kwazo akuhlangene nesehlakalo sangesonto eledlule, lapho kudutshulwe khona imoto ekhokhelwa ngabanga, ethutha abantu (i-Uber),” kusho uSibiya.
UMnu Sifiso Shangase, okhulumela iSantaco, uthi abantu mabehlise imimoya, kakukho ukuphazamiseka okuzoba khona kwezokuthutha kwezinye izingxenye zeTheku.
“Sinazo izingxoxo nomnyango wezokuthutha njengoba amalungu ethu KwaDabeka engagculisekile ngendlela udaba lwama-Uber namatekisi olusingethwe ngayo kuleya ndawo,’ kusho uShangase.
