Isithombe: nguJohn Hlongwa
INTUKUTHELO ibibhalwe ebusweni kubaholi bomdabu, okungamakhosi, abaNtwana baseNdlunkulu kaZulu, amadidiyeli bamabutho, nezinduna ngesikhathi kunomhlangano wokubhunga ngokwedelelwa kweSilo, uMisuzulu kaZwelithini,ezinkundleni zokuxhumana.
Umhlangano ubungoLwesibili, eMhlanga, eThekwini. Lokhu kulandele ukusabalala ezinkundleni zokuxhumana kwama-video omuntu ozibiza ngoMax Makhanya, othi ungowesizwe saKwaMakhanya, KwaSobonakhona, eMbumbulu, eshiya engalazi kwiNdlulamithii (iSilo).
Abaholi boMdabu abebekhona balibeke ngesihloko elokuthi isizwe sakwaMakhanya, yisona okufanele silungise “lo monakalo” ngoba umuntu othuka iSilo lapha uzibiza ngabo.
INduna uMnu Muzi Nyandeni, engumdidiyeli wamabutho esifundeni iZululand, ithi kuyaxaka okwenzeka egameni esizwe sakwaMakhanya ngoba ngabantu abangaconsi phansi laba eNdlunkulu kaZulu.
“Ngesikhathi iSilo uMdlokomane, iNgonyama uZwelithini kaBhekuzulu (isaphila), isibizile esigodlweni eNyokeni, yahlabisa amabutho esizwe sakwaMakhanya izinkomo ezine. Thina sazi ukuthi yisizwe esinobudlelwano obuhle neNdlunkulu lesi. Siyamangala uma sekuqhamuka umuntu ozibiza ngokuthi ungowakulesi sizwe, ecokofula iMbube, ngalolu hlobo. Lo muntu uyasho ukuthi ngobani abamthumile,” kusho uNyandeni.
UMengameli wamaBhinca, uMnu Ngizwe Mchunu, naye ovame ukuvela ezinkundleni zokuxhumana eqekevula, uziqhelelanisile nalo Max.
“Abantu bese benza ihlaya ngokuthi lo muntu owedelela iSilo ngiyamazi. INdlunkulu kufanele ibheke ukuthi konakele kuphi kuyona ngaphakathi. Kufanele ibe nochwepheshe abazoyeluleka ngezinto ezithinta ubuxhakaxhaka nobuchwepheshe ngoba, abantu basebenzisa bona manje. Kuliwa enye impi manje,” kusho uMchunu.
Abaholi ebebekhona bajube uMnu Mbongeni Makhanya, onguNdunakulu wesizwe saKwaMakhanya, ukuthi axhumane nezinhlaka zobuholi bomdabu neNdlunkulu kaZulu, kubonakale ukuthi lolu daba, oselukhuphule imimoya lungalungiswa kanjani.
Okuphawulekile kulo mhlangano nesithangami sabezindaba wukuthi uSihlalo weNdlu yabaHoli boMdabu KwaZulu-Natal, iNkosi uSifiso Shinga, nesigungu sayo bebengekho.
menzi.jele@ilanganews.co.za
