INTATHELI YELANGA
IZINQUMO esezithathwe wuhulumeni zibandakanya ukuthi zizovalwa ngokushesha zonke izitolo ezibandakanyekayo ezigamekweni zokugula nokufa kwezingane emuva kokudla imikhiqizo ethengwe kuzo.
Esinye isinqumo ngesokuthi zonke izitolo nezinye izindawo ezidayisa ukudla kumele zibhaliswe komasipala ezinsukwini ezingama-21 kusukela manje. Izitolo okuzotholakala ukuthi azibhalisiwe emuva kwalezi zinsuku zizovalwa.
Lezi zinqumo zimenyezekwe nguMengameli Cyril Ramaphosa ngoLwesihlanu kusihlwa ngesikhathi ethula inkulumo yesizwe mayelana nale nkinga yokugula nokufa kwezingane emuva kokudla imikhiqizo edayisa kuma-spaza shop, osekutholakale ukuthi inoshevu osetshenziswa ukubulala izilwanyana okubalwa kuzo namagundwane.
URamaphosa uveze ukuthi zingaphezulu kuka-800 izigameko ezibikiwe ezwenì, kanti izifundazwe lapho kudlange kakhulu le yiGauteng kanye neKwaZulu-Natal, bese kulandela nezinye. Uveze nokuthi zibalelwa ngaphezulu kuka-20 izingane esezishonile.
