IBUYELA eNkantolo yeMantshi yaseHowick namuhla iNkosi yesizwe saKwaNxamalala eMpendle eyamaniswa namacala abucayi okungelokubulala umshana wayo uMnu Nhlalayenza Ndlovu owayeyikhansela le-DA elingusotswebhu kuMasipala uMngeni eHowick ngoZibandlela (December) 2023.
Inkosi Simphiwe Eric Zuma (56) ibhekene namacala amathathu okubulala. Lo mholi uzokwazi namuhla ukuthi siphumelele yini isicelo sakhe sokudedelwa ngebheyili. Ufake isicelo sokudedelwa ngebheyili ecaleni lokufa komshana wakhe. Sekuphele izinyanga ezimbili engaphakathi esitokisini. Waboshwa kungakapheli ngisho iviki ededelwe ngebheyili ecaleni lokufa kukandunankulu wakhe uMnu Qalokunye Zuma owadutshulwa ngababulali abangaziwa esemzini wakho.
Emasontweni amabili adlule kwengezwe elinye icala lokubulawa kukaMnu Xolani Ntombela owayeyisishoshovu somphakathi.
Maqondana necala lokubulawa kukandunankulu inkosi yadedelwa ngebheyili ka-R25 000. Umbuso usezinhlelweni zokuba kuhoxiswe isinqumo sebheyili ngoba kunezinsolo zokuthi inkosi yagwazela imantshi yaseMpendle ngemali elinganiselwa ku-R200 000.
UMnu Francious Rodgers ohola iDA KwaZulu-Natal uthe bafuna kukhishwe isinqumo namuhla ngoLwesihlanu ukuze kuzokhululeka umndeni wakwaNdlovu.
