UNDUNANKULU waKwaZulu Natal uMnu Thami Ntuli usezwakalise ukukhathazeka ngezigameko zodlame ezenzeke ezindaweni ezahlukene kulesi sifundazwe kula maholidi kaKhisimusi.
Ngokwemibiko yamaphoyisa ngezintatha zangoLwesine kubulawe amadoda amathathu aneminyaka ephakathi kuka-26 no-36 ubudala endaweni yaKwaMpondo eDabhazi KwaNongoma.
Kubikwa ukuthi laba balisa okuvela ukuthi ngabakwaSibiya badutshulwe emakhanda.
UNtuli unxuse umphakathi wakule ndawo nanoma wubani ongaba nolwazi ngalesi sigameko abikele amaphoyisa ukuze kuboshwe abenzi bobubi.
Uthe umthetho namaphoyisa ngeke ayinqobe impi yobugebengu ngaphandle kokubambisana nomphakathi.
Kwesinye isigameko endaweni yaseMahlongwa eMkomazi amaphoyisa abike ukuthi owesifazane ugwazwe amanxeba amaningi yisithandwa sakhe ezintatha zangoLwesine.
Uthe ukusebenza ngokuzikhandla kwamaphoyisa kuholele ekutheni asheshe akhalelwe ngamasongo kaSgonyela umsolwa kulesi sigameko.
Undunankulu uthe ziyamkhathaza izigameko zakamuva ezenzeka ezindaweni ezisogwini oluseningizimu nesifundazwe.
Uthe izigameko zalolu hlobo zisho ukwehlelwa yisithunzi sempilo yomuntu ikakhulukazi owesifazane.
“Kumele sinxuse abesilisa ukuba bavikele abesifazane nganoma iyiphi indlela,” kusho undunankulu.
Uveze ukuthi abezokuphepha, abaholi bendabuko basebenza ngokuphindiwe ukulwa nalesi sihlava sodlame olubhekiswe kwabesifazane nezingane.
