Isithombe: THOKOZANI NDLOVU
INKANTOLO yeMantshi yaseThekwini isinqumele ugwayi katiki amaphoyisa abophe owesilisa (34) okuthiwa ungumfundisi odabuka eBurundi, othweswe amacala okuzama ukubulala uNkk Nomthandozo Mbhele (43) nendodakazi yakhe, ukuba amlethe enkantolo kusasa.
Isisulu esingudadewabo kasomahlaya nomlingisi, uPastor Mjosty, kuthiwa sigwazwe amanxeba angaphezu kuka-40 yilo wesilisa, salimaza nendodakazi yakhe. Umsolwa ubengekho enkantolo namuhla kodwa umphenyi wecala uthe kungenxa yokuthi ulimele njengoba bambopha esikekile esandleni, njengoba esalaliswe esibhedlela.
Imantshi uMnu Scelo Zuma ithe amaphoyisa aphule umthetho ngokuzithathela isinqumo sokuthi amyise esibhedlela, engamlethanga enkantolo.
“Nokuthi isibhedlela sithathe isinqumo sokuthi sihlele ukumyisa kwesinye azohlolwa kusona umqondo, akukho emthethweni ngoba kunamacala athweswe wona. Kumele eze enkantolo imbone, bese kuba yiyona enqumayo isibone isimo sakhe ukuthi ngeke akwazi yini ukumelana namacala. Ngidinga nimlethe enkantolo kusasa azovela okokuqala,” kusho imantshi.
Lo wesilisa uthweswe amacala amane okungawokuzama ukubulala amabili, njengoba kuthiwa wagwaza nendodakazi kaNkz Mbhele ngesikhathi emhlasela, elokuhlukumeza ngokobulili nelokuba seNingizimu Afrika ngokungemthetho njengoba kuthiwa akanamaphepha okuba kuleli.
Nokuba sesibhedlela kuvele ukuthi ubekalelwe amahora angu-72 bese eyiswa esitokisini ukuze avele enkantolo. Umphenyi uthe amahora angu-72 asephelile kodwa bebelinde umbiko kadokotela.
Uphinde waveza ukuthi nasemaphoyiseni wazivumela ukuthi nguyena ogwaze uNkz Mbhele futhi ulimale esandleni ngesikhathi emgwaza. AbeMarch and March bathe nakusasa bazobe bekhona enkantolo ukuyokweseka umndeni wakwaMbhele kulesi simo.
Ummeli uMnu Xolani Zuma olekelela umdeni wakwaMbhele kuleli cala uthe uzokwenza isiqiniseko ukuthi leli cala lisingathwa ngendlela. Uthe umndeni uyakwazi ukuthi ufake isicelo sokuthi umuntu ashushiswe eceleni uma kungukuthi inkantolo iyanqaba ukumshushisa.
Lokhu uthe kungenxa yokuthi indlela olusingathwe ngayo lolu daba ishayisa amakhala ngoba imibiko engaqinisekisiwe iveza ukuthi ummangalelwa ubenezidakamizwa emzimbeni.
