I-SOUTH African Human Rights Commission (SAHRC) inxusa ukubekezelelana kubantu kulandela isigameko sokubulawa kowokufika eThekwini, nephoyisa eNorth West okuthiwa libulawe ngumuntu wangaphandle.
Ngeledlule kuqubuke imvunge ezinkundleni zokuxhumana kubonakala iVideo yephoyisa lishayiswa kabuhlungu yimoto, esigamekweni esenzeke enxanxatheleni yezitolo eLichtenburg. Ngalo eledlule, kubonakale kwiVideo abantu abebebhikisha enkabeni yeTheku, beshaya umuntu wokufika okuthiwa uphethe ngokushona.
I-SAHRC ithi ifuna kuphenywe ngalezi zigameko ngoba akekho umuntu onelungelo lokuzithathela umthetho ngezandla, kungakhathalekile ubuzwe bakhe. Ithi wonke umuntu unelungelo lokuphila.
“Siyikhomishini siyazigxeka zonke izenzo zodlame, okubalwa nokuhlaselwa kwamaphoyisa. Siyakugxeka nokubulawa kowokufika okuthiwa ubulawe ngababhikishi eThekwini. Ukungaboni ngaso linye ngodaba lokufuduka kwabantu, ukwentuleka kwemisebeni, ubugebengu nokungatholakali kwezidingo akusona isizathu sokususa udlame,” kusho uMnu Wisani Baloyi, okhulumela iSAHRC.
Uthe ikhomishini iyalihlonipha ilungelo labantu lokuhlangana nokubhikisha ukuveza okubakhathazayo, kodwa lokhu kumele kwenzeke ngokuthula, kungabi khona okuphambene nomthetho.
