AMALUNGU eMK Party, kulindeleke ukuthi agcwale izitaladi zeTheku, ngoLwesine, ezokweseka uNkk Duduzile Zuma- Sambudla oyindodakazi kaMengameli waleli qembu uMnu Jacob Zuma.
UNkk Zuma-Sambula, uzovela eNkantolo yeMantshi, eThekwini, njengoba ebhekene namacala ancikene nezibhelu zikaNtulikazi (July unrests) zango-2021, lapho abantu, KwaZulu-Natal naseGauteng ,bavuka umbhejazana bazitapela ezitolo baphinde balimaza nempahla.
Kwadaleka umonakalo omkhulu emnothweni wezwe, ngenxa yalezi zibhelu, futhi babalelwa ku-300 abantu abafa ngenxa yazo.
UNkk. Zuma-Sambula, usolwa ngokuthi ungomunye wababekhuthaza abantu esebenzisa izinkundla zokuxhumana, ethi abaqhubeke batape ezitolo.
Ngo-2022, uPhiko lwezokuShushisa kuleli, iNational Prosecution Authority (NPA), yathi isabheka ukuthi indodakazi kaMsholozi, izokwethweswa yini amacala.
Isinqumo sesithathiwe njengoba uDuduzile ezovela enkantolo ngoLwesine.
UDuduzile useyulungu lePhalamende likazwelonke lapho emele khona iMK Party.
