UZOBUSISA bonke abaholi bemikhakha eyehlukene eSwaziland umholi webandla lamaNazaretha ohlangothini lwaseBuhleni iNkosi Mduduzi ‘Nyazilwezulu’ Shembe. Namuhla ngoLwesibili uNyazi lufulathele elakuleli lalibangisa kuleliya lizwe eliholwa yiNgonyama Makhosetive ‘Mswati III’ Dlamini.
Lo mholi uvale ngokusemthethweni umhlangano wamakholwa ebandla lakhe wamasonto amathathu obubanjelwe KwaJobe, eJozini. Minyaka yonke lo mholi ukhipha imihlangano ehanjiswa ezingxenyeni ezahlukene zesifundazwe. Owasenyakatho umhlangano uwuvala ngokuthi angene kuleliya lizwe. Lo wunyaka wesithathu uNyazi lungena eSwaziland emuva kokuba ngonyaka ka-2023 lwaphiwa indawo yiNgonyama uMswati III.
Okhulumela leli bandla uMnu Thokozani Mncwabe utshele ILANGA ukuthi umholi ufulathele elakuleli ngoba kufanele ayobusisa izakhamizi neziphathimandla zakuleliya lizwe. “Amakholwa asuka kuleli nalawo angaphakathi kwelaseSwaziland ankanise emngceleni ohlukanisa elakuleli naleliya iGolela. Abanye bayamphelezela. Abangaphakathi bayamemukela. Miningi nje imigidi eqhubekayo emngceleni. Kuningi azokwenza kuleliya lizwe,” kusho uMncwabe.
