Ilanga News
Home 9 Ezokungcebeleka 9 Ezamasiko 9 Injabulo iGagasi FM lihlabana ngezindondo

Injabulo iGagasi FM lihlabana ngezindondo

by | 24 July 2026

INJABULO umsakazo ozimele ozinze KwaZulu Natal iGagasi FM uqopha umlando ngokuhlabana ngezindondo ezinhlanu emcimbini wokuklomelisa weBest Of Durban Readers Choice Awards 2026.

Lo msakazo okhombisa ukuba intandodakazi yabalaleli baKwaZulu Natal uqophe lo mlando ohambisana nomgubho wawo weminyaka ewu-20 usemoyeni.

Kulo nyaka lo msakazo ugubha le minyaka kusukela waqala ukuzwakala emoyeni eminyakeni ewu-20 eyedlule.

Kulo mcimbi iGagasi eseliphendule usikompilo lwesifundazwe beliqokwe emininxeni eyahlukene njengoba ligcine lohlabana nezinhlanu.

Phakathi kweminxa lo msakazo ohlabane kuwona kubalwa oweBest Local Radio Personality lapho kuhlabane khona uSelby Sebyonce Mkhize, kwathi Felix Hlophe walala isibili kuwona lo munxa, uhlelo lwasekuseni i-The Uprising luthole indawo yesibili emnxeni weBest Local Radio Show kwatho olwantambama iThe Gagasi Fastlane lwaphuma indawo yesithathu.

Lo msakazo wona uthole indawo yesibili emnxeni weBest Local Radio Station.

Ekhuluma ngokuhlabana kwalo msakazo uMinenhle Dlamini oyiManaging Director yalo msakazo uthe lezi zindondo zibalulekile kakhulu kulo msakazo.

“Zibalulekile ezinhliziyweni zethu ngoba zimele wonke amaphimbo abantu abamqoka kithina, okungabalaleli bethu,” kusho uMinenhle.

Uthe kule minyaka eyedlule lo msakazo ubuhlale uqokwa eminxeni eyahlukene kulo mcimbi weBest of Durban Readers Choice Awards kodwa bebebuya belambatha.

“Ukuqala ngezindondo ezinhlanu ngonyaka lapho sigubha khona iminyaka ewu-20 kusho lukhulu kithina futhi siyathobeka kakhulu,” kusho yena.

Khona manjalo le njabulo yalo msakazo iza kungakapheli nesikhathi esingakanani uhlabane nenye indondo koweKZN Top Business Awards 2026.

Kulo mcimbi iGagasi lihlabane ngendondo yePartnership Award ngokubambisana neHollywood Foundation ngezinhlelo zokusiza umphakathi okubalwa kuzo Geleza neGagasi, Adopt A School neGagasi FM Christmas Miracle kusukela ngo-2023.

Ezisematheni

I-MKP isifake isimangalo ifuna kucwaningwe amavoti ayo eThekwini

I-MKP isifake isimangalo ifuna kucwaningwe amavoti ayo eThekwini

IQEMBU uMkhonto weSizwe Party selifake isimangalo kwikhomishana yokhetho i-IEC kwaZulu-Natal njengoba lisola ukuthi kukhona okungahanjisiwe kahle ekubalweni kwamavoti ayo. Lokhu kuza emva kokuthi kube nemibiko yokungadonsi kahle kwemishini kwezinye izindawo okuthiwa...

Ogqame kokamaskandi ungena kowesicathamiya

Ogqame kokamaskandi ungena kowesicathamiya

BAJABULELE 'ukuqaqeka' kwezinkinga emculweni wabo abaculi besicathamiya, ngesikhathi kungenelela kuwona odume kakhulu kwezokuhlelwa kwemicimbi kamaskandi eThekwini. Lokhu kuvezwe ngabaculi bakacothoza, bejabulela ukungenelela kukaMnu Xolani Mcineka owaziwa...