Injabulo nendumalo kwabakuleli abagijima kwamanye amazwe

INTATHELI YELANGA

ABADLALI baseNingizimu Afrika abagijima kwamanye amazwe bayaqhubeka nokukhombisa umhlaba ukuthi yini ephekwa ebhodweni likanobhusthuzwayo wakuleli, ikakhulukazi iBetway Premiership.

U-Elias Mokwana obolekwe i-Al-Hazem Club yaseSaudi Arabia yi-Esperance de Tunis yaseTunisia, uqale umshikashika wokuzibuyisela kwiBafana Bafana eshaya igoli lakhe lokuqala edlubhe imibala ye-Al-Hazem – egijima kwiSaudi Pro League, okukhona kuyona i-Al-Nassr okudlala kuyona uCristiano Ronaldo – ngesikhathi iguqisa i-Al-Kholood ngo-2-1 ngoLwesihlanu.

* UFagrie Lakay wodumo kwiSuperSport United (eseyiSiwelele), iBidvest Wits (engasekho) neCape Town City, uqokwe njengomdlali wosuku ngesikhathi ezakhe, iCeramica Cleopatra zihlula iPharco ngo-2-0 kowe-Egyptian Premier League ngoMgqibelo. ULakay ushaye elinye lamagoli okunqobe ngawo iCeramica. 

* U-Antonio van Wyk wodumo kwiStellenbosch FC, noYusuf Maart wodumo kwiKaizer Chiefs, balale bengadlalelwe emuva kokuba ikilabhu yabo, iSV Ried iguqiswa yiHartberg ngo-2-0 kowe-Austrian Bundeslinga ngoMgqibelo. Laba badlali bawugijime wonke umdlalo.

KUSUKELA kwesobunxele ngenhla; nguThembinkosi Lorch, nguYusuf Maart, nguNeo Maema, nguCassius Mailula, nguFragie Lakay, nguMihlali Mayambela, nguJamie Webber, nguLyle Foster, ngu-Ethan Brooks noLuther Singh, kanti kwesiphakathi nguRulani Mokwena.

* Isitobha seBafana esakhuliswa yiChiefs, uSiyabonga Ngezana, siwudlale wonke oweFC Steaua București ibambana nePetrolul ngo-1-1 koweRomanian Superliga ngoMgqibelo. 

* USamkelo “Qina” Kabini, obedlala kwiTS Galaxy, naye oyisitobha seBafana, uphume enkundleni kuqhilika izihlathi emuva kokuba ezakhe, iMolde FK zibhubhise iBrann ngo-4-0 koweNorwegian Eliteserien ngoMgqibelo. 

* UCassius Mailula ozakhele igama egijima kwiMamelodi Sundowns, uwubuke ebhentshini waze wayophela umdlalo wezakhe, iKV Kortrik ngesikhathi zigudluza iiMommel ngo-4-2 koweBelgian Pro League, kanti kube ngesifanayo nakuShandre Campbell weClub Brugge ngesikhathi iguqisa iRoyal Breydel ngo-1-0. Yomibili le midlabo ibingoMgqibelo. 

* Isilomo seBafana esizakhele igama kwi-Orlando Pirates, uMohau Nkota, sidlale imizuzu ewu-81 ngesikhathi ikilabhu yaso, i-Al-Ettifag idla i-Al-Fayha ngo-3-2 koweSaudi Pro League ngoMgqibelo. 

* E-England, uLyle Foster – ongumgadli weBafana – uhlulekile wukusebenzisa imizuzu ewu-18 anikwe yona ngesakupheleni komdlalo ukutakula iBurnley ngesikhathi iguqiswa yiChelsea ngo-2-0 kowe-English Premiership ngoMgqibelo. EzikaFoster kubukeka zilengelwa yimbazo njengoba zilele endaweni ka-17 kwil-log. Kanti zibhekene nalesi simo nje, zibuya khona ehlathini eseliphenduke ikhaya lazo. 

NGUSIPHEPHELO Sithole.

* Injini yeBafana uSphephelo Sithole, egijima kwiCD Tondela yasePortugal, ingene ngomzuzu ka-72 ngesikhathi le kilabhu ibhekene neCaldas SC kowesigaba sesine seTaca de Portugal (Cup of Portugal), nokho uJobe uhlulekile wukusiza ezakhe ukudlulela esigabeni esilandelayo salo mqhudelwano njengoba zihlulwe ngo-6-5 wamaphenathi. 

* UMihlali Mayambela – ongumfowabo kaMark “Umsab’ Ungamazi” Mayambela wodumo kwiBloemfontein Celtic nePirates – owake waba ngesinye sezethenjwa zeBafana, udlale imizuzu ewu-81 ngesikhathi i-Aris Limassol ihlulwa yiPafos ngo-2-1 ngoLwesihlanu koweCypriot First Division, yaseCyprus. Ngakolunye uhlangothi, uLuther Singh owake wathi qu kwiBafana, uwudlale wonke umdlalo we-AEL Limassol FC ngesikhathi iguqisa i-Apoel ngo-2-1 ngeSonto, koweligi. 

* UGift Links uwugijime wonke umdlalo ngesikhathi iGymnastikforening iguqisa iSilkeborg ngo-2-0 koweDenmark Superliga ngoLwesihlanu. Yize isibongo sakwaLinks singadumile njengoZwane, oMokoena noModise kunobhutshuzwayo waseNingizimu Afrika, kodwa uGift akayena uwokuqala walesi sibongo ukuduma ebholeni lakuleli. Uzokhumbuleka uRoger Links owayeyisitobha seCape Town Spurs phakathi kuka-1990 no-93. Ngaleso sikhathi, kwiSpurs kwakukhona uThabo Mngomeni, u-Edries Burton – owagqama kakhulu kwiSantos (yaseCape Town) – noShaun Bartlett ongadinge kuchazwa kunobhutshuzwayo wakuleli.

* U-Ethan Brooks ogcine ukudlala kuleli egijima kumaZulu FC, uwuqedele ebhentshini umdlalo wezakhe, iPanserraikos zibhubhudlwa yiPanathinaikos ngo-3-0 koweGreek Super League ngoMgqibelo. UBrooks ukhishwe ngomzuzu ka-58 kulo mdlalo.

* UJamie Webber weFC Tulsa edlala kwi-USL Championship – okuyisigaba esiphakela iMLS yase-USA amakilabhu asevuthiwe – ukhishwe nge-extra time, kanti ezakhe zizohlulwa ngo-5-3 wamaphenathi yiPittsburgh Riverhounds SC kowe-USL Championship ngoMgqibelo. UWebber ugqame kwiSekhukhune United.

* UNeo Maema noRushine de Reuck bodumo kwiDowns, bebekhona ngesikhathi iSimba SC yaseTanzania ivula ngebatha isigaba samaqoqo eCaf Confederation Cup, ihlulwa yi-Atletico Petroleos yase-Angola ngo-1-0 ngeSonto. 

* UThembinkosi Lorch – wodumo kwiPirates neDowns, okulokhu kukhalwe njalo ngokuzitshwa kwakhe kwiBafana – uphume enkundleni ehambela phezulu njengoba ikilabhu yakhe iWydad AC yaseMorocco ibolise ngenduku iNairobi United yaseKenya, iyigaxa u-3-0 koweCaf Confederation Cup ngeSonto. ULorch nguyena owakhe igoli lokuqala leWydad. 

* URulani Mokwena ongumqeqeshi weMC Alger yase-Algeria, uhlulwe umdlalo wakhe wokuqala ngesikhathi le kilabhu igaxwa u-2-1 yi-Al Hilal yaseSudan koweCaf Champions League. Emidlalweni ewu-13 lo mqeqeshi esebhentshini le-Alger, usegijime imidlalo ewu-13, wanqoba ewu-8, wadlala ngokulingana kwewu-4, wahlulwa yi-Al Hilal eqede umdlalo ingasaphelele, kukhishwa u-Al Hassan Adel ngekhadi elibomvu ngomzuzu ka-87.