UPHENDULE ngokukhulu ukucophelela umqeqeshi we-Orlando Pirates uJose Riveiro, ephawula ngodaba lukaMonnapule Saleng, osekuphele isikhathi eside engabonakali enkundleni ngenxa yezinkinga phakathi kwakhe nabaphathi bekilabhu.
USaleng ubevutha engabaselwe esigabeni sokuqala sesizini ka-2024/25 njengoba eshaye amagoli ayisihlanu emidlalweni ewu-13 okubalwa kuwona nakowamanqamu weMTN8 abawudlala neStellenbosch FC eMoses Mabhida Stadium eThekwini ngoMfumfu (October) nyakenye.
Sekuyisikhashana uSaleng engabonwa ngisho ebhentshini kwiPirates. Ngokungabi bikho kwalesi sibabuli somdlali, uRiveiro uphoqeleke ukuthembela kuMohau Nkota obegijima kwinjejane yeziMnyama.
Ebuzwa ngodaba lukaSaleng, uRiveiro uthe uzophawula ngokucophelela ngoba “noma yini engingayisho ngalolu daba izodayisa amaphephandaba. Engingakusho nje wukuthi ngizifisela inhlanhla zombili izinhlaka ezithintekayo. Akuwona umsebenzi wami ukukhuluma ngezinto ezifana nalezi,” esho.
Uthe okwakhe wukugxila kubadlali abaphambi kwakhe, anikwe bona ukubasebenzisa. IBucs izobhekana neMamelodi Sundowns koweBetway Premiership ngeSonto ngo-15h30 eFNB Stadium, eSoweto.
