Isithombe: nguJohn Hlongwa
YESABELA impilo yayo iNkosi yesizwe saKwaHlathikhulu, eNtabamhlophe, eMtshezi, uSibonelo Mkhize (47), ngemuva kokuba igama layo linekwe emphakathini njengomuntu “ofuna ukudla izithende” iSilo uMisuzulu kaZwelithini, esikhundleni saso sokuba nguSihlalo webhodi yeNgonyama Trust.
NgoLwesihlanu olwedlule uDkt Thandiwe Dlamini, obeyilungu lebhodi eselesulile, ukhulume esidlangaleni, wathi iNkosi uMkhize isithathe umsebenzi weSilo wokusayinela imali kwiNgonyama Trust, okuwumsebenzi waso njengoSihlalo.
UDkt Dlamini wagagula igama leNkosi uMkhize njengelinye lamalungu ebhodi ngokusho kwakhe, akhipha iSilo inyumbazane.
NgoLwesithathu esigcawini sabezindaba eMgungundlovu, ebesibizwe ngamalungu ebhodi yeNgonyama Trust, ezophendula izinsolo abekwa zona zokungahloniphi nokungasifuni iSilo, iNkosi uMkhize izwakalise ukuphatheka kabi ngokunekwa kwegama layo emphakathini.
Ithe indlela okuchazwe ngayo ukuthi isithathe indawo yeSilo ebhodini, kakulona iqiniso. “Ibhodi lathatha isinqumo sokuthi, Khabazela ngoba nguwena uSihlalo wekomidi lezemali, sicela ukuthi okwesikhashana ngoba usihlalo wethu iSilo samaBandla sisabambekile, kube nguwena ozosisayinela ezintweni zama-akhawunti,” kusho inkosi.
Icacisile ukuthi ukusayina kwayo kakuchazi ukuthi isayina yodwa. Ithi kokunye kusayina isikhulu esiphezulu (CEO) uMnu Vela Mngwengwe, nomphathi wemali (CFO) uMnu Siyamdumisa Vilakazi.
Ithi ukunxuswa kwayo ukuba ilekelele ngokusayina njengosihlalo wekomidi lezemali, yingoba bekwenzelwa ukuba iNgonyama Trust ikwazi ukuqhubeka nokwenza umsebenzi. INkosi uMkhize ithi icacisa lokhu ngoba sekwakheke isithombe esibi ngegama layo.
“Into ebuhlungu wukuthi abanye abantu abaphuma ezizweni zethu, nabanye abantu mhlawumbe ababona ukuthi uKhabazela usezama ukuzenza ngcono, bangagcina sebefuna ukuthi kube khona into abangenza yona,” kusho iNkosi uMkhize.
Uphawule ngokuthi maningi amakhosi asebulewe, kwachaphazeleka nemindeni yawo. Uthi kuyishwa ukuthi kube khona abantu abagagula amagama abantu ngendlela engalungile, libe lingekho iqiniso kwabakushoyo.
Inxuse ukuthi uma kukhona into abantu abafuna ukuyenza kuyona, kungachaphazeleki izingane zayo. Ithi kubuhlungu ukuthi kube nomuntu onguzakwabo, abangamazi ukuthi unaziphi izinhloso, obeka impilo yabo engcupheni.
