ISOUTH African Democratic Teachers Union (Sadtu) ithi izinkinga ezikhungethe uMnyango weMfundo eyisiSekelo KwaZulu-Natal, ngeke zaxazululwa ngosuku olulodwa.
Lokhu kulandela umbiko ongemuhle okhishwe yiSouth African Human Rights Commission (SAHRC) ngeledlule – ngesimo sezikole zakulesi sifundazwe, njengoba eziningi zingenawo amanzi ahlanzekile okuphuza nogesi, kanti kwezinye amagumbi okufundela agcwele ayachichima.
UNkz Nomarashiya Caluza, okhulumela iSadtu esifundazweni, uthi inkinga enkulu kwezemfundo, wukuncishiswa kwesabelomali.
“Sincishisiwe isabelomali soMnyango wezeMfundo eyisisekelo ezweni lonke, kodwa iKwaZulu-Natal igqemeke ingozi engeqiwa ntwala ngoba yiyona enabafundi abaningi, imali siyayidinga.
“Ingqalasizinda iyawohloka ezikoleni. Lokhu kwenza ukuba abafundi bezithole sebenamagu-mbi okufunda okungena kuwona imvula uma izulu lina. Abafundi kufanele bacatshangelwe ngokuthi babekwe eqhulwini,” esho.
UNdunankulu uMnu Thami Ntuli noNgqongqoshe wezeMfundo esifundzweni uMnu Sipho Hlomuka, bake baba nembizo ekuqaleni kwalo nyaka, lapho kwakudingidwa izinkinga ezikhona ezikoleni, okubalwa nokusabalala kwezidakamizwa, ukwehlelwa wumfutho wokufunda kubafundi nowokufundisa kothisha.
