YEHLE izinyembezi iphiwa isipho semoto inkosi yesizwe saKwaMpungose, eNkandla ishadelwa ezinkundleni zemidlalo yakwaMasipala edolobheni ngoLwesihlanu. INkosi uZakhe Mpungose, inikezwe izikhiye zonyanyavu lwemoto yohlobo lweveni Hilux yenani lika-R700 000. Le moto ikhishwe yisizwe saKwaMpungose, sathi sifuna inkosi ingagibeli amatekisi nowakwayo uNkk Thabisile Goqo Mpungose. Inikezwe izikhiye ezihambisana namaphepha ayo imoto akhombisa ukuthi kayikweleti.
Ichaza ngalokhu inkosi ithe ishaqekile ngoba akukaze kufike ezindlebeni zayo ukuthi isizwe sayo sinezinhlelo zokuyipha isipho esikhulu kangaka.
“Umphakathi bekade uyenza iminikelo yokuthi inkosi yawo izoshadelwa njengoba kwenzeka nakwezinye izizwe. Ngishaqekile uma sengibona ukuthi bengihlelelwe ihhasi elifana naleli,” kusho iNkosi.
Itshele ILANGA ukuthi kuyayijabulisa ukubona isizwe sayo sibambisane ngokwenza izinto ezinhle. Ithe lokhu okwenzeke ngosuku lomshado wayo, ayisoze yakukhohlwa. Iveze ukuthi kuyaqala emlandweni selokhu yahola lesi sizwe ukuba iphiwe yisizwe isipho esingafaniswa nesikhulu kangaka. Inkosi ithi isazoqhubeka ithathe omunye unkosikazi uma amandla iwathola. Ishade umishado wezinsuku ezimbili. NgoMgqibelo kushadwe owesintu.
Kuhlatshwe izinkomo eziwu-30, kanti amabutho abalandwe ezifundeni ezahlukahlukene ngamabhasi. Amabutho afike ngothi lwawo eholwa amakhosi ahlukahlukene. Inkosi ibusiswe ngezingane ezimbili emshadweni wayo. Itshele ILANGA ukuthi bekungokuqala ishadelwa.
“Bengisalungisa, yingakho ngishadelwe emuva kwesikhathi eside. Ngiyabonga kakhulu ukwesekwa izizwe zamakhosi,” esho.
Inkosi ithi kusemkhankasweni womndeni ukushadelwa.
Mthobisis@ilanganews.co.za
