ISouth African Weather Service isikhiphe isexwayiso ngesimo sezulu ezingesihle esingadala izikhukhula ezingxenyeni eziningi zeKwaZulu-Natal kusasa ngoMsombuluko, nangoLwesibili.
Kuthiwa izimvula ezinamandla ezihambisana nokuduma kwezulu zingalindeleka esifundazweni sonke, ikakhulu ezindaweni ezisempumalanga yesifundazwe, okubalwa kuzo nezindawo ezingaphansi kukaMasipala iRay Nkonyeni.
Lezi zimvula okulindeleke ukuthi zibe nangaphezu kuka-120mm, zingadala umonakalo okubalwa kuwona:
● Izikhukhula ezingakhahlameza izakhamizi, zilimaze imigwaqo namabhuloho
● Ubungozi kubantu abahlala eduze kwemifula nemihosha
● Ukuphazamiseka kokuhamba kwezimoto ngenxa yamanzi amaningi emigwaqweni
● Ukuvela kwemigodi (sinkholes) nokuwa kwamatshe amakhulu
● Ukuphazamiseka kwezinsiza ezibalulekile (njengamanzi, ugesi nezokuxhumana).
Nakhu abantu abanxuswa ukuba bakwenze:
● Uma kungenzeka, hlala endlini, ugweme ukuba semgwaqweni
● Gwema ukuwela lapho kunamanzi agijimayo, adlula phezulu kwamaqakala
● Uma uvaleleke emotweni ngesikhathi sezikhukhula, yishiye lapho, ubalekele endaweni ephakeme
● Ezindaweni ezisemakhaya, abantu mabavikele imfuyo ngokuthi bayibeke ezindaweni eziphakeme
● Qaphela uma uhamba emgwaqeni njengoba kungenzeka ama-pothole nama-sinkhole engabonakali.
