UMASIPALA wesiFunda iZululand uthi konke sekumi ngomumo ngeZululand District Maratho ezokuba ngoMgqibelo isukela ePrince Mangusuthu Airport, oLundi, isongwe eBhekuzulu High School, KwaNongoma.
Lo mjaho ophethe isamba sika-R100 000 ukhuza ibuya kulo nyaka kulandela ukuphazamiseka kwawo njengoba ugcine ukugijinywa ngo-2019. Izindaba zokubuya kwalo mjaho ziqinisekiswe wumasipala wesifunda ongabaxhasi bawo usebenzisana neSiyathuthuka Athletics Club neNongoma AC.
Abahleli bawo bakuqinisekisile ukuthi uyaqhubeka ngemuva kokuba nongabazane ngemuva kokube wethuliwe kwase kuyathula. UCeli Makhoba ongomunye wabahleli uthe: “Izinto zihamba kahle kakhulu. Nezinamba zabasubathi abawungenelayo ziyenyuka. Sizovala ngoLwesithathu ebusuku ukubhalisa online.
“Iminenelo sizophinde siyamukele ngoMgqibelo kusuka ngo-10 ekuseni kuze kube wu-9 ebusuku lapho usukela khona esikhumulweni sezindiza. Lo mjaho muhle kulabo abaya kwiComrades Marathon.
“Nginethemba lokuthi sizokwenyuka kakhulu isibalo ngoMgqibelo ngoba abanye abasubathi baye benze izinto ngosuku lo mjaho, sebazi ukuthi ngeke baphazanyiswe yilutho.”
Lo mjaho uzokube uhambisana ne-10km nayo ezokuba ngeSonto ijikeleza KwaNongoma. ILANGA lithole ukuthi lo mjaho uzokube ungenelwe ngabasubathi abanohlonze. Phakathi kwabo kukhona uFikile Mbuthuma, uSkhumbuzo Mpanza, uSiyabonga Mafuleka, uBrian Ontieri, uJadi Davy, UTsepang Makhethi, uThobani Chagwe nabanye.
Izingqwele ze-52km zizohlomula ngo-R100 000, 2.R50 000, 3.R25 000, kwehle njalo kuze kufike kunombolo 10 ozogoduka no-R3000. Izingqwele ze-21km zibekelwe isamba sika-R5000, isibili kube wu-R4000 nakhona kuze kufike koweshumi ozothola u-R500.
