UKHUZA ibuya umcimbi waminyaka yonke wokuqhakambisa osomabhizinisi abakhiqiza izinhlobo ezahlukene zohlobo lokudla okubizwa ngekota emalokishini nasezindaweni ezahlukene.
Kulindeleke izinkumbi zabantu zibuthane kulo mcimbi obizwa ngeThekwini Kota Festival ozoba sezinkudleni zemidlalo iPeoples Park Moses Mabhida Stadium eThekwini kusasa ngoMgqibelo.
Kulo mcimbi kuzobe kushetshwa izibiliboco zekota nedili lomculo njengoba kuboshelwe inqwaba yabaculi abanohlonze nosaziwayo. Phakathi kwabaculi ababoshelwe kulo mcimbi kubalwa uSjava, Big Zulu, Nasty C, Elaine, Kabza De Small, Young Stunna, Mthandeni SK, Feza, Mawhoo, Naledi Aphiwe, Aynos, Blxckie, Kyotic nabanye abaningi.
Abaphathi bohlelo uSomizi noNapo Modise kanti amasango avulwa ngo-10 ekuseni njengoba umcimbi uzophela ngeleshumi kusihlwa.
Ngaphandle kwezibiliboco zekota nedili lomculo kulo mcimbi uhlose ukuhlomulisa nokuthuthukisa osombhizinisi abenza lolu hlobo lokudla.
Kulindeleke ukuthi kulo nyaka senyuke isibalo sabawuhambelayo njengoba ngonyaka owedlule babalelwa ku-4000 abebekhona kanti kulo nyaka kubhekwe abangaphezulu kuka-5700.
Lokhu kudalwa nawukwanda kosomabhizinisi abazobe bekhona bekhangisa ngalezi zibiliboco ezidumile ezindaweni ezahlukene kulo nyaka kulindeleke babe wu-60 abazobe bekhona njengoba bephindwe kabili kunesangonyaka owedlule.
Amathikithi ayaqhubeka nokutholakala njengoba eqala ngawabafundi abiza uR150 bese kuthi ajwayelekile womphakathi abize uR200, awezicukuthwane abize uR800.
