LIGUQELE uLwesibili oluzayo icala elibhekene noMnu Victor Majola (44), oyanyaniswa nokubulala usaziwayo uWarrick “Dj Warras” Stock.
UMajola, obhekene namacala amabili okungelokubulala nokwakha itulo lokubulala ubevele namuhla eNkantolo yeMantshi yaseGoli, lapho obekulindeleke khona ukuba afake isicelo sebheyili, kodwa kwangenzeka, umbuso ufaka isicelo sokuba lihlehle icala.
UMajola usolwa ngokumdubula abulale uDj Warras, owadutshulwa ngenyanga eyedlule nekabeni yedolobha laseGoli, okwabe sekuvela izinsolo zokuthi ukubulawa kwakhe kuhlobene nomsebenzi owawenziwa yinkampani yakhe yonogada eyayiqaphe amabhilidi ekuhleliwe kuwo ngokungekho emthethweni kuleli dolobha.
Ekhuluma ngaphandle kwenkantolo uNkk Nicole Stock-Mabuza ongudadewabo uthi umndeni uzolinda umthetho udlale indima yayo.
“Umthetho uthi umuntu umsulwa aze atholakalale enecala. Sizolinda ubufakazi obuzovela ngaphambi kokuthi sikholwe ukuthi uye ngempela onesandla ekubulaweni komfowethu,” esho.
