BABALELWA ngaphezulu kuka-15 000 abasolwa ababoshiwe ngesikhathi samaholidi kaDecember KwaZulu Natal. Lokhu kuvezwe yisitatimende samaphoyisa akulesi sifundazwe ngoMsombuluko.
Amaphoyisa aveze ukuthi ukusebenza kwawo ngaphansi kwezinhlelo ezahlukene zezokuphepha kuholele ekutheni kuboshwe abasolwa abawu-15 294 ngokwephula umthetho ngezindlela ezahlukene ngo-December 2024.
Okhulumela amaphoyisa akulesi sifundazwe uColonel Robert Netshiunda uthe abasolwa abawu-5158 baboshelwe ubugebengu, kwathi abawu-256 baboshelwa ukubulala, abawu-274 bona baboshelwa ukuzama ukubulala.
Uqhube ngokuthi kwababulewe kusetshenziswe izikhali eziyingoi okubalwa kuzo izibhamu nommese.
Uphinde waveza ukuthi kulezi zinhlelo zokuqapha ukuphepha zangoDecember amaphoyisa aphinde athola nezibhamu eziwu-359 nezinhlamvu eziwu-3 195 nemimmese ewu-769.
Uveze ukuthi babalelwa ku-296 baboshelwe amacala okudlwengula.
Uthe amacala okushaya ngenhloso yokulimaza iningi lawo enzeke ngenxa yophuzo oludakayo kuboswe abasolwa abawu-2525 njengoba abawu-264 beboshelwe amacala okugqekeza izindlu, nabawu-46 ababoshelwe ukuntshontsha imfuyo.
Abawu-1367 baboshelwe amacala athinta izidakamizwa kwathi abawu-1117 baboshelwa ukushayela bedle amanzi amponjwana, nabawu-304 ababoshelwe ukuphuza ezindaweni zomphakathi ezivulelekile.
Udalule ukuthi abawu-554 baboshelwe ukutholakala bedakiwe ezindaweni zomphakathi njengoba abawu-887 bona beboshelwe ukuthengisa utshwala ngokungemthetho.
Abawu-15 baboshelwe ukusabalalisa utshwala ngokunemthetho njengoba abawu-26 beboshowa ukukhiqiza utshwala obuwumbombayi.
