KUBOSHWE nekhehla elineminyaka ewu-74 ubudala ngokushayela imoto licwile ezinkambeni zikaFaro ngoholidi leBoxing Day ngesikhathi amaphoyisa omgwaqo eqhuba umkhankaso wawo obizwa ngokuthi #NenzaniLaEzweni eMargate ePort Shepstone.
Ngokwesitatimende soMnyango wezokuThutha KwaZulu Natal kuboshwe abashayeli abawu-38 ababanjwe beshayela izimoto bedakiwe. Kwababoshiwe kubalwa nomshayei oneminyaka ewu-74 ubudala, abesifazane abawu-9 nabesilisa abawu-29.
ENewcastle kuboshwe abawu-32 obekukhona kubona iphoyisa, othisha ababili nezisebenzi zezimo eziphuthumayo osebenza kwizicishamlilo nosebenza nama-ambulence.
EGroutville eStanger kuboshwe abanye abawu-32 ngakho ukushayela bedlela amanzi amponjwana.
Kubona bekukhona nobeminyaka ewu-65 ubudala.
UNgqongqoshe walo mnyango uMnu Siboniso Duma uncome ukusebenza ngokuzimisela kwamaphoyisa omgwaqo ikakhulukazi ngalesi sikhathi sonyaka.
Uthe abantu bakulesi sifundazwe bakhuthazekile ngendlela amaphoyisa akhombisa ngayo ukuzimisela ukulwa nokuqeda izingozi zomgwaqo.
UDuma ubonge amaphoyisa kaMasipala waseRay Nkonyeni, KwaDukuza kanjalo namaphoyisa kazwelonke SAPS nawomgwaqo iNational Traffic Police.
Uveze ukuthi kusukela ngomhla ka-12 ku-August nonyaka sekuboshwe abashayeli abalinganiselwa ku-2600 ngokwephula imithetho yomgwaqo.
