INHLANGANO eyengamele iNetball emhlabeni iWorld Netball (WN) imise umengameli weNetball South Africa (NSA) uCecialia Molokwane.
Ngokombiko weNSA ithi ithole incwadi iphuma kwiWN iyazisa ngokumiswa kukamengameli wayo uCecilia ophinde abe ngumengameli we-Africa Netball.
Kulencwadi kuthiwa akukho lapho icacisa khona ukuthi wenzeni. Ithi uzobizelwa esigcawini esilungisa ubugwegwe.
Kube sekudonswa ngendlebe iNSA ukuba iyihloniphe lencwadi ephuma kwiWN ngoba nayo ingase ilandele umengameli wayo.
INSA ithi izame kaningi ukuxhumana neWN izama ukuthola ukuthi kwenzekeni kodwa yanqaba yaphela ukuchaza ngokumiswa kukamengameli wayo.
Lencwadi kuthiwa iqhuba ithi izintambo kufanele zibanjwe yisekela likaCecilia kwiNSA uMami Diale kuze kuba uvela ngaphambi kwekomiti eliqondisa ubugwegwe.
UCecilia umiswa nje, ubesanda kuphumela obala ukuthi ufuna ukungenela ukhetho lweNSA ihlandla lwesithathu.
Ungene kwiNSA ngo-2017.
Lolu khetho luzokuba nonyaka.
Lesi sikhulu kuthiwa siyinkukhu nempaka nomengameli weKZN Netball uGugu Ngema.
