KUBOSHWE abantu abathathu okubalwa kubona nonina wengane ebonakala kwi-video esabalale ezinkundleni zokuxhumana ibonakala ibhenyiswa izidakamizwa.
Amaphoyisa aseGoli akuqinisekisile ukuthi abasolwa baboshwe ngoLwesibili eNewclare. Le video esabalale ekuqaleni kwaleli sonto isuse umsindo ezinkundleni zokuxhumamana, kwaze kwangenelela uphiko lweKP, ngaphansi kwamaphoyisa kamasipala waseGoli, iJMPD.
Okhulumela iJMPD, uMnu Xolani Fihla, uthe amalungu abo abehambahamba ehlola indawo ngesikhathi elunywa indlebe ngalapho kukhona abasolwa.
“Amaphoyisa anikele emzini oseNewclare lapho efice khona unina wengane ovelayo kule video. Ube esekhomba abanye ababili abavelayo, okubalwa kubona noqophe i-video,” esho.
Kuthiwa abasolwa, behlohlwa imibuzo ngamaphoyisa, bavumile ukuthi bebesenzisa isidakamizwa iMandrax, nokuthi bayiqophile i-video. Bebesagqunywe esitokisini kanti bekulindeleke ukuba bavele enkatolo maduze ngamacala okubalwa kuwona nokuhlukumeza umntwana.
Omakhalekhukhwini babo bazoya kocwaningwa ukuze abakuqukethe kuzosetshenziswa enkantolo. Umntwana usisiwe kulo muzi, wabekwa ngaphansi kweso lophiko lweFamily Violence, Child Protection, and Sexual Offences Unit, ngaphansi kweSAPS.
