UNGQONGQOSHE wezokuHlaliswa kwaBantu uNkk Thembi Simelane uvakashele e-Eastern Cape ukuyohlola umonakalo odalwe yizikhukhula kulesiya sifundazwe ngeledlule.
Namuhla ngoLwesibili ekuseni bese sifinyelele ku-90 isibalo sabantu okuqinisekiswe ukuthi bashonile kule nhlekelele, kanti abawu-30 babo bekuyizingane. Yethuse abaningi ingozi yetekisi egugulwe ngamanzi omfula, kwashona kuyona izingane eziwu-6, kwathi ezintathu zasindiswa wukubambelela ngezihlahla.
Uhambo lukaNkk Simelane, lwezinsuku ezintathu, luza ngemuva kokuba uMengameli Cyril Ramaphosa ehambele izindawo ezikhahlamezeke kakhulu, okubalwa kuzona ezingaphansi komasipala besifunda i-OR Tambo naMathole.
Uhulumeni wase-Eastern Cape, oholwa nguNdundankulu uMnu Oscar Mabuyane, ubeke usuku lwangoLwesine njengolokuzilela imiphefumulo elahlekile.
Abotakulo bebesaqhubeka nokubheka ezinye izisulu, kanti uhulumeni, izinhlangano ezisiza umphakathi nabezenkolo basebenza ngokubambisana ukusiza imindeni esale dengwane.
