ISITHOMBE NGUPHUMLANI GAMA
WEMUKELWE ngohlu lwezikhalo uNdunankulu waKwaZulu-Natal uMnu Thami Ntuli, ngesikhathi eyohlangana namalungu omphakathi waseMkhanyakude ehholo lomphakathi iNkosi Mzondeni Community Hall KwaMsane, eMtubatuba, namuhla ngoLwesine.
Lo mholi uhambele kule ndawo ngenhloso yokuqhuba umkhankaso wakhe wokulwisana nobugebengu esifundazweni. Ubehambisana nabaholi bemikhakha eyehlukene okubalwa kubona uNkk Thembeni kaMadlopha-Mthethwa onguNgqongqoshe wezoLimo nokuThuthukiswa koMphakathi esifundazweni, iMeya yaseJozini uMnu Mfananaye Mathe neyaseMtubatuba uMnu Mxolisi Mthethwa, noSomlomo waseMkhanyakude uMnu Solomon Mkhombo.
Le mbizo ibusiswe wukuhanjelwa ngamakhosi ezizwe zaseMkhanyakude abeholwa ngusihlalo wawo esifundazweni eKZN, iNkosi Sifiso Shinga. Imbizo yanamuhla yandulelwe yimashi yamalungu omphakathi waseMtubatuba ebuholwa yimeya uMthethwa.
Ingxenye yamalungu omphakathi ihlangabeze undunankulu ngamabhodi anemibhalo eyehlukene yezinto akhala ngazo, mayelana nobugebengu endaweni.
“Sicela undunankulu ungenelele maqondana nezinkinga esibhekene nazo. Kubuhlungu esibhekene nakho ngenxa yobungebengu. Sekuphele iminyaka singamavolontiya ezinkulisa esifundisa kuzona,” kusho eminye yemibhalo.
UNtuli uthe uyazemukela izikhalo zamalungu omphakathi. Unxuse abesilisa ukuba bavikele abesifazane nezingane emiphakathini abahlala kuyona.
“Umkhankaso wokuqwashisa ngobugebengu kufanele uqhubeke. Amavolontiya nabantu bonke emiphakathini kufanele benze izingxoxo zokufundisana ngezimpawu zobugebengu. Siyazi ukuthi kalikho izwe eliqasha iphoyisa elizogada umuzi nomuzi.
“Ngiyakuqonda ukuthi unzima kangakanani umsebenzi owenziwa ngabantu abavolontiya emiphakathini. Angeke ngenze izethembiso ezinkulu ngaphandle kokuba ngisho ukuthi sesinazo izinhlelo zokuthi bakhokhelwe imali abasuke beyisebenzisile uma belwisana nobugebengu emiphakathini.
“Umzali onengane engene ezidakamizweni kufanele ayithathe ayihambise ezinhlakeni ezifanele, ayitholele usizo. Ngiyacela umphakathi ukuba ubambisane namaphoyisa nezinye izinhlaka, kuliwe nesihlava sobugebengu,” kusho uNtuli.
