I-South African Weather Service isikhiphe isexwayiso ngezimvula ezinamandla ezihambisana nokuduma kwezulu ezilindelwe ukuba zigadle ezingxenyeni eziningi zaKwaZulu-Natal kusukela namuhla ngoLwesithathu ntambama kuya entathakusa kusasa ngoLwesine.
Kuthiwa lezi zimvula zingadala izikhukhula ezingacekela phansi imigwaqo nezakhiwo (ikakhulu imijondolo) futhi zidale nokuthi kungashayeleki kahle emigwaqweni yakuleli.
Umasipala weTheku ukhiphe isitatimende unxusa abashayeli ukushayela ngokucophelela, bangalandelani eduze emigwaqweni emanzi. Uthe ithimba lawo elibhekelele izinhlekelele limi ngomumo, ukuphuthuma lapho lidingeka khona.
Kunxuswa nabantu ukuqaphela nokuhlala ezindlini, bagweme izindlela ezingabalulekile nokuwela imihosha nemifula.
