KUZOFANELE iMK Party imthathele izinyathelo uNobhala Jikelele wayo, uMnu Floyd Shivhambu ngesenzo sakhe sokuvakashela ibandla likaMfu Shepherd Bushiri i-Enlightened Christian Gathering eMalawi enkonzweni yePhasika.
Lokhu kuvezwe umhlaziyi wezepolitiki ozimele uSolwazi Zakhele Ndlovu ofundisa izifundo zePolitical Science e-University of KwaZulu Natal othe uShivhambu udicilele phansi isithunzi seqembu angumholi walo ngokwesikhundla asiqhoqhobele sokuba nguNobhala Jikelele.
“Isikhundla sikaNobhala Jikelele singesesibili esimqoka eqenjini kulandela esikamengameli, ngakho ukubonakala kukaShivhambu noBushiri kube wubulima obuphindiwe njengoba bekumele akwazi ukuhlaziya ukuthi lokhu kuzomqhatha neqembu lakhe ikakhulukazi njengoba bekuwuhambo lwakhe olungahlangene nalo,” kusho yena.
Uthe uShivhambu ngalesi senzo sakhe sivulele nalabo abangazwani naye intuba yokuthi basisebenzisa ukuqhubeka nokumgxibha njengoba sekucacile ukithi kukhona iqeqebane elingahambisani nobuholi bakhe kuyona iMK Party. UNdlovu uthe kuzomangaza uma iMK Party ingazithathi izinyathelo ngalokhu ikakhulukazi njengoba ikhiphe isitatimende iziqhelelanisa nesenzo sakhe.
Uqhube ngokuthi okwenzwe uShivhambu akugcinanga ngokudicilela phansi isithunzi seqembu lakhe, kodwa esomthethosisekelo wezwe njengoba lo muntu kuvela ukuthi washiya umonakalo wakhombisa nokungawuhloniphi umthetho wakuleli.
“Kuyimanje iNingizimu Afrika isezinhlelweni zokumbuyisa ukuzobhekana nengalo yomthetho njengoba ebhekene namacala abucayi,” esho. UBushiri wavulelwa amacala okubalwa kuwo awokukhwabanisa, ukushushumbisa imali nokudlwengula. Uveze ukuthi ngokubona kwakhe okukho obengaba kuhle ngokuhambela leli bandla kukaShivhambu ngaphandle kokuthi ubezama ukuzakhela ugazi kubantu baseMalawi asebezinze kuleli njengoba bebaningi abakuleli lizwe asebengabakuleli ngokugcwele.
“Ngibona ukuthi usuka nenkolelo yakhe esekwi-EFF yokuhlanganisa izwekazi i-Afrika kodwa kuphambane izinkomishi kwangamhambela kahle,” esho. UMnyango wezobuLungiswa kuleli usigxekile isenzo sikaShivhambu. Ungqongqoshe walo mnyango uNkk Mmamaloko Kubayi usichaze njengesibukela phansi isithunzi seNingizimu Afrika.
