BHEKI NDLOVANA
AMALUNGU enyunyana yothisha iSouth African Democratic Teachers Union asebenzise ithuba embizweni kamengameli wezwe eMnini, eMgababa, ukuzwakalisa izikhalo zawo.
Idlanzana lalawa malungu aqale abhikisha ngaphandle kwenkundla ebekwenzelwe kuyo umcimbi, ngokuhamba kwesikhathi angena ngaphakathi.
UNobhala weSadtu KwaZulu-Natal, uNkk Nomarashiya Caluza uwakhuzile amalungu wathi angabhikishi ngaphakathi, futhi mawangaphathi izingqwembe.
Ngokusho kukaNkk Caluza, into abakhala ngayo wukungakhokhi koMnyango wezeMfundo imali yezinsiza kusebenza ezikoleni, ebizwa phecelezi ngama-norms and standards. Uthi ukungakhokhwa kwale mali kuphazamisa ukusebenza ezikoleni ngenxa yokushoda kwezinsiza kusebenza. Uthi lesi simo siphoqa othisha ukuba bagcine sebeshaya emaphaketheni abo.
Kule mbizo kaMengameli Cyril Ramaphosa umphakathi wethule izikhalo zawo kuhulumeni.
