SENZO SOKHELA
UTHI kufezeke iphupho likayise ngokujoyina kwakhe iKaizer Chiefs uSiphesihle “Mbesuma” Ndlovu (28) odlala esiswini kule kilabhu.
UNdlovu ujoyine iChiefs ekuqaleni kwale sizini, esuka kwiSuperSport United edayisiwe njengoba isiyiSiwelele FC.
Lo mdlali uwelise iChiefs eyishayela igoli enqobe ngalo ihlula iPolokwane City ngo-1-0 koweBetway Premiership eFNB Stadium, eSoweto ngoLwesithathu olwedlule. Ushaye leli goli esuka ebhentshini.Â
NGUSIPHESIHLE Ndlovu (okwesokudla) enozakwabo uNkosingiphile Ngcobo noPule Mmodi, bejabulela igoli lakhe. ISITHOMBE NGABE: BACKPAGEPIX
UNdlovu uthi kufezeke iphupho likayise ngokugcina ejoyine iChiefs.
“Bekuyiphupho likababa ukuthi ngijoyine iChiefs kwazise uqale ukuba ngumlandeli wayo eneminyaka yobudala ewu-17-18. Bekuvele kuyisifiso sami ukuthi ngilifeze iphupho lakhe, lokhu kusho lukhulu kimina. Esikhathini esedlule like lavela ithuba lokuthi ngijoyine iChiefs, kodwa kwangenzeka. Ngibe sengizitshela ukuthi kufanele ngisebenze kanzima ukuze kwenzeke, nangempela sekunjalo, sengilapha. Yisahluko sami esisha lesi, wuhambo lwami olumqoka empilweni yami, engethemba ukuthi luzoba yimpumelelo,” kusho uNdlovu.
UNdlovu kulindeleke ukuba abe yingxenye yeqembu leChiefs elizobhekana neRichards Bay FC kusasa ngoLwesibili ngo-19h30 eFNB Stadium.
