UZITHETHELELE uPitso “Jingles” Mosimane ongumqeqeshi weBafana Bafana ngokuqokela kuleli qembu kungalindele muntu uSiyanda “Skhwishi” Ndlovu ogijima kwiMamelodi Sundowns.
USkhwishi uyingxenye yeBafana ezogijima imidlalo yokuhlungela i-Africa Cup of Nations (Afcon) neKenya ngomhla ka-13 wale nyanga ngo-18h00 e-Orlando Amstel Arena, eSoweto, kuthi umlenze wesibili ugijinywe mhla ka-17 ekuhambeni.
IKenya icijwa nguBenni McCarthy osaphethe irekhodi lokuba namagoli amaningi kwiBafana.
UMosimane ushiye ngaphandle uNkosikhona Radebe odlala emuva kumaZulu FC, uThakasani Mbanjwa ongunozinti kwiLamontville Golden Arrows, uNqaba Xulu ongumgadli weRichards Bay FC noKhulumane Ndamane oyisitobha seSundowns ukubala nje abadlali abambalwa abebeyingxenye yeqembu abezoqoka kulona isikwati azokuya naso kule midlalo.
Nokho kushaqise abaningi sekuvela igama likaSkhwishi obengekho ohlwini.
UMosimane uthe: “Ungamshiya kanjani umdlali ofana noNdlovu ekubeni enza kahle kwiSundowns? Abalandeli kufanele bakuqonde ukuthi siyakha lapha, (uNdlovu) uyikusasa leBafana. Yingakho kumqoka ukuthi ngibazi abadlali ngisho nalaba abagijima ezikwatini ezincane.
“UMbokazi (uMbekezeli) simnike ithuba lokuba sesikwatini ngoba sifuna ukubona eduze bonke abadlali. Le midlalo ezayo imqoka kakhulu kubadlali. Kufanele noma yikanjani sibe yingxenye ye-Afcon (ngonyaka ozayo), futhi singene nakwiFifa World Cup yango-2030 (ezokuba sePortugal, eSpain naseMorocco).
“Kunabadlali engingakwazanga ukubaqoka njengo-Aden McCarthy, othole ikhadi elibomvu ekilabhini yakhe.”
Uthi okwenze lo mdlalo bawugijimela e-Orlando, wukuthi bafuna ukuthatha ngokushesha ibhanoyi eliya eKenya emuva kwawo.
* Sesisonke isikwati seBafana simi kanje:-
Onozinti: uRonwen Williams, uSipho Chaine noRicardo Goss.
Izitobha: u-Aubrey Modiba, uSamkelo Kabini, uFawaaz Basadien, uThapelo Morena, u-Olwethu Makhanya, uMbekezeli Mbokazi, u-Ime Okon noThabang Matuludi.
Abasesiswini: uTeboho Mokoena, uThalente Mbatha, uSiphephelo Sithole, uBathusi Aubaas noBrooklyn Poggenpoel.
Abagadli: uLyle Foster, u-Iqraam Rayners, uCassius Mailula, u-Oswin Appollis, uPuso Dithejane, uRelebohile Mofokeng, uTashreeq Mathews, uLuther Singh, uTshepang Moremi noSiyanda Ndlovu.
