KUQHUME izinhlamvu zenjoloba kuhlakazwa abamashi okuthiwa bashise imoto ngaphandle kweNkantolo yoMthethosisekelo, eBraamfontein, eGoli.
Lokhu kwenzeke ngesikhathi laba bamashi abebeholwa yilowo owayengumsakazi woKhozi FM, uNgizwe Mchunu, bebemasha besuka kwaMai Mai beya eNkantolo yoMthethosisekelo, beyozwakalisa ulaka lwabo ngesinqumo sale nkantolo esigunyaza abokufika abakuleli ngokungemthetho ukuba baye emahhovisi akwandabazabantu bayofaka izicelo zokuba ababhaci kuleli, uma bebalekela izimpi emazweni abo.
Ngokwemibiko yamaphoyisa akekho olimele futhi akekho oboshiwe kulesi sigameko. Ekhuluma nabezindaba uMchunu uthi izakhamizi zakuleli zizoqhubeka nokuzwakalisa ulaka lwazo uma kungekho okwenziwayo ngalesi sinqumo senkantolo.
Abebeyingxenye yemashi beveze ukuthi bayasemukela isinqumo soMnyango wezaseKhaya sokuhoxisa isinqumo sawo sokuqala ukusebenzisa isinqumo senkantolo. Bathi nakuba kunjalo bayakuqonda ukuthi isinqumo senkantolo kasikaguquki.
