IZITHOMBE NGU: ZAMANI MATHE
UBELINDE kudlule umgcagco wenkosi yesizwe sakubo ngaphambi kokuganwa umculi kamaskandi uKhuzani “iNdlamlenze” Mpungose, ezizowushaya kuyena mhla ka-15 kuZibandlela (December) kulo nyaka.
Uveze lokhu ephawula ngomgcagco wenkosi yakubo, iNkosi uZakhe Mpungose, ngoMgqibelo endaweni yaKwaZikhali, eNkandla. UKhuzani uthe wamemezela usuku lomgcagco wakhe ngoba umndeni wase uluhlonzile olomgcagco wenkosi, nakuba lwalungakamenyezelwa emphakathini.
“Njengoba inkosi isigcagcelwe, sekuzolandela mina,” esho.
Iphawula ngomgcagco wayo inkosi, ithe njengamanje isemkhankasweni wokugqugquzela isizwe ukuba sikhuthalele ukushada nokushadelwa.
“Uma ngibona amabutho egcwele umuzi kababa ngenxa yokuthi aseka ubukhosi bakithi, kuyangijabulisa kakhulu,” kusho inkosi.
Emgcagcweni bekuhlatshwe izinkomo eziwu-30, kanti amabutho ezizwe zamakhosi abelandwe ngamabhasi. Phakathi kwamakhosi amadala ebukhosini, kubalwa iNkosi uBhekizwe Biyela yaseMahlayizeni, eNkandla. Lo mgagco ubuhanjelwe nguNdunankulu wesifundazwe uMnu Thami Ntuli noNgqongqoshe wezokuBusa ngokuBambisana nezoMdabu KwaZulu-Natal, uMfu Thulasizwe Buthelezi.
Ngakolunye uhlangothi uNdlunkulu weNkosi, uNkk Thabisile uMaGoqo Biyela, uthe uphelelwe amazwi okubonga.
Inkosi ithe isazothatha inkosikazi yesibili uma amandla evuma, ngoba iyasithanda isithembu. Ibuzwa ngokuthi ibona kanjani ngomthetho omusha oshaywe wuhulumeni wokuthi amadoda uma eshadelwa, angashintsha izibongo zawo abize ezomakoti, ithe kayihambisani nalokho.
